قومی اردو کونسل فارسی زبان و ادب کی مستند تاریخ شائع کرے گی: ڈاکٹر شیخ عقیل احمد
قومی اردو کونسل میں فارسی زبان وادب کے پینل کی آن لائن میٹنگ
ہندوستان میں فارسی زبان و ادب کی مستحکم روایت رہی ہے اور اس زبان میں ہمارے ملک کی تاریخ و ادب کا ایک بڑا سرمایہ موجود ہے جس کی حفاظت ہم سب کی ذمے داری ہے ۔ یہ باتیں کونسل کے ڈائرکٹرا ڈاکٹر شیخ عقیل احمد نے فارسی زبان وادب کے پینل کی آن لائن میٹنگ میں کہیں۔انھوں نے کہا کہ ایک زمانے میں ہندوستان کی سرکاری زبان فارسی ہی تھی اور اسی زبان میں تمام علمی و سرکاری کام انجام پاتے تھے،اردو زبان و ادب پر بھی فارسی کے گہرے اثرات ہیں اس لیے اردو والوں کا نہ صرف فارسی ادب کی تاریخ سے واقف ہونا ضروری ہے بلکہ بڑی حد تک اس زبان کے قواعد ورموز سے آگاہی بھی لازم ہے۔ڈاکٹر عقیل نے کہا کہ ہندوستان میں فارسی ادب کی اس وقیع تاریخ کو محفوظ کرنے کے مقصد سے پینل کی پچھلی میٹنگ میں یہ طے کیاگیا تھا کہ کونسل کے زیر اہتمام چار جلدوں پر مشتمل ہندوستان میں فارسی زبان و ادب کی ایک جامع و مستند تاریخ مرتب کی جائے گی اورچاروں جلدوں کی ترتیب کی ذمے داری فارسی زبان و ادب سے تعلق رکھنے والے پینل کے چار اہم ممبران کے سپرد کی گئی تھی اوران حضرات کی طرف سے پروجیکٹ کا ابتدائی خاکہ بھی ہمارے پاس آچکا ہے۔انھوں نے اس علمی و تحقیقی منصوبے کو جلد از جلد مکمل کرنے پر زور دیتے ہوئے ممبران سے گزارش کی کہ ہماری خواہش ہے کہ سال بھر کے اندر اندر یہ کتاب کونسل کی طرف سے شائع ہوجائے،لہذا اسے ترجیحی بنیاد پر مکمل کرنا ضروری ہے۔ تمام ممبران نے ان کی تائید کی اورپروجیکٹ کی رفتار میں تیزی لانے پر اتفاق کیا گیا۔ اس موقعے پر پچھلی میٹنگ کی دیگر تجاویزبھی زیر بحث آئیں اور ان پر اتفاق رائے کا اظہار کیاگیا۔
پینل کی صدارت پروفیسر آزرمی دخت صفوی نے کی ۔ جبکہ میٹنگ کے دیگر شرکاء میں پروفیسر عبدالحلیم،پروفیسر حسن عباس، پروفیسر عثمان غنی،پروفیسر راجندر وشوناتھ جوشی کےعلاوہ کونسل کی اسسٹنٹ ڈائریکٹر(اکیڈمک) ڈاکٹر شمع کوثر یزدانی، ڈاکٹر فیروز عالم (اسسٹنٹ ایجوکیشن آفیسر)اور ساجد الحق کے نام شامل ہیں ۔.
